35 ఏళ్ల తర్వాత పరీక్ష రాసిన 50 ఏళ్ల మహిళ.. వీడియో వైరల్

పట్టుదల ఉంటే వయసు కేవలం ఒక సంఖ్య మాత్రమేనని నిరూపిస్తూ, మంజు నారంగ్ అనే 50 ఏళ్ల మహిళ 35 ఏళ్ల సుదీర్ఘ విరామం తర్వాత తిరిగి కాలేజీలో పరీక్షకు హాజరయ్యారు. దీనికి సంబంధించిన వీడియో ప్రస్తుతం సోషల్ మీడియాలో వైరల్‌గా మారి ఎంతో మందికి స్ఫూర్తినిస్తోంది. మంజు నారంగ్ తన ఇన్‌స్టాగ్రామ్ ఖాతాలో ఈ వీడియోను పంచుకున్నారు.

ఈ వీడియోలో మంజు నారంగ్ ఎంతో ఉత్సాహంగా, ఆత్మవిశ్వాసంతో కాలేజీ ప్రాంగణంలోకి నడుచుకుంటూ వెళ్లడం కనిపిస్తుంది. పరీక్ష హాల్‌లోకి వెళ్లే ముందు ఆమె కెమెరా వైపు చూస్తూ, 'మిత్రులారా, ఈరోజు నాకు పరీక్ష ఉంది' అని చెప్పారు. అదే సమయంలో ఆమె కుమారుడు వెనుక నుంచి 'ఆల్ ది బెస్ట్' అని శుభాకాంక్షలు తెలపడం వీడియోలో వినిపిస్తుంది.

ఈ పోస్ట్‌కు "చదువుకోవడానికి వయసుతో సంబంధం లేదనేది నిజమైంది" అని క్యాప్షన్ జోడించారు. అలాగే, "35 ఏళ్ల తర్వాత కూడా మీరు మీ బ్యాక్ పేపర్లను క్లియర్ చేస్తున్నారు" అనే సరదా వ్యాఖ్యను కూడా వీడియోపై ఉంచారు. ఈ వీడియో చూసిన నెటిజన్లు ఆమె దృఢ సంకల్పానికి ఫిదా అవుతున్నారు. "ఆంటీ మీకు ఆల్ ది బెస్ట్, మిమ్మల్ని చూస్తుంటే గర్వంగా ఉంది" అంటూ ప్రశంసల వర్షం కురిపిస్తున్నారు.